वॉर्ड बॉय आणि महिला नर्सच्या मदतीने डॉक्टरचा नर्सवर बलात्कार

मुरादाबाद : देशात महिलांवर अत्याचाराचे घटनेचा आलेख वाढतच असून कोलकातामध्ये डॉक्टर तरुणीवर झालेले लैंगिक अत्याचार आणि हत्येचं प्रकरण ताज असतानाच रुग्णालयातच डॉक्टरने एका नर्सवर बलात्कार झाल्याची धक्कादायक घटना समोर आली आहे.

रुग्णालयातील वॉर्ड बॉय आणि एका महिला नर्सने पीडित नर्सला जबरदस्तीने एका डॉक्टरच्या खोलीत पाठवलं आणि दरवाजा बंद केला. नर्सवर लैंगिक अत्याचार करुन तिला याबाबत कुठेही न बोलण्याचं सांगत अन्यथा जीवे मारण्याची धमकी दिली. तरुणी मागील १० महिन्यांपासून रुग्णालयात नर्सचं काम करत होती. १७ ऑगस्टच्या संध्याकाळी ती ७ वाजता नाईट ड्यूटीसाठी गेली होती. त्यावेळी ही घटना मुरादाबादमधील ठाकुरद्वारा येथील एका खासगी रुग्णालयात घडली.

घटनेनंतर पीडितेच्या कुटुंबियांनी डॉक्टर आरोपी शाहनवाज, नर्स मेहनाज आणि जुनैद या तिघांविरोधात तक्रार दाखल केली आहे. त्यानंतर पोलिसांनी तिघांना अटक केली आहे.

तरुणी नाईट शिफ्टला असताना तिला एका दुसऱ्या नर्सने डॉ. शाहनवाजने बोलवलं असल्याचं सांगितलं. यावर पीडित तरुणीने जाण्यास नकार दिला. त्यानंतर रात्री जवळपास साडे बारा वाजचता वॉर्ड बॉय जुनैद आला आणि त्याने तरुणीला डॉक्टरकडे जा असं सांगितलं. पण तरीही तरुणी जाण्यास तयार नव्हती. त्यानंतर तिला वॉर्ड बॉय आणि नर्सने जबरदस्तीने डॉक्टरच्या खोलीत नेलं आणि बाहेरुन दरवाजा बंद केला.

तरुणीने जीवाच्या आकांताने बाहेरील नर्सला मदतीसाठी आवाज दिला मात्र तिच्या मदतीसाठी कोणीही आलं नाही. डॉक्टरने तरुणीवर बलात्कार करत तिला हवे तेवढे पैसे देतो असं सांगत, कोणालाही काहीही न सांगण्याची धमकी दिली. काही सांगितल्यास जीवे मारण्याची धमकी दिली.

या दरम्यान पीडित तरुणीचा मोबाईल वॉर्ड बॉयने स्वत:कडे ठेवला होता. सकाळी तरुणी घरी गेल्यानंतर संपूर्ण प्रकार सांगितला आणि त्यानंतर पोलिसांत तक्रार दाखल केली. या प्रकरणानंतर रुग्णालय सील करण्याची प्रक्रिया सुरू करण्यात आली आहे.