बदलापूर तसेच पुणे येथील शाळेत लैगिंक अत्याचाराच्या घटना ताज्या असतानाच अकोल्यात ही एक संतापजनक प्रकार समोर आला आहे. शिक्षकानेच सहा विद्यार्थीनींसोबत अत्याचार केल्याची धक्कादायक घटना उघड झाल आहे.
अकोला जिल्ह्यातल्या बाळापूर तालुक्यातील हा संतापजनक प्रकार आहे. काजीखेड येथे जिल्हा परिषदेच्या उच्च माध्यमिक शाळेत एका शिक्षकाने अश्लील व्हिडिओ दाखवत सहा विद्यार्थीनींचा छळ केल्याची घटना समोर आली. या घटनेमुळे अकोला हादरलाय. ही खळबळजनक घटना आज मंगळवारी संध्याकाळी उघडकीस आली. याप्रकाराने जिल्हाभरात सर्वत्र संताप व्यक्त होत आहे.
प्रमोद सरदार असे त्या शिक्षकाचे नाव असून तो काजीखेड येथे जिल्हा परिषदच्या उच्च माध्यमिक शाळेत कार्यरत आहे. त्याने आठवीत शिकणाऱ्या विद्यार्थीनींना अश्लील व्हिडिओ दाखवत छळ केला. अश्लील चित्रफित दाखवत असताना त्याने मुलींना वाईट पद्धतीने स्पर्श करत अश्लील संभाषण केले. हा प्रकार मागील चार महिन्यांपासून सुरू असल्याचा आरोप या शिक्षकांवर विद्यार्थीनींनी केला आहे.
आज मंगळवारी पीडित विद्यार्थिनींनी या घटनेसंदर्भात पालकांना सांगितल्यानंतर त्यांना धक्का बसलाय. त्यानंतर संतप्त झालेल्या पालकांनी उरळ पोलिसांकडे धाव घेत शिक्षकांविरोधात तक्रार दाखल केली. याप्रकरणी उरळ पोलिसांनी शिक्षकाच्या विरोधात गुन्हा दाखल केला आहे. दरम्यान विद्यार्थिनीचा विनयभंग करणारा शिक्षक प्रमोद सरदार याला पोलिसांनी ताब्यात घेतले आहे.
दरम्यान या संपूर्ण प्रकारावर राज्य महिला आयोगाच्या माजी सदस्य आशा मिरगे यांनी या शिक्षकांवर कठोर कारवाईची मागणी केली..
