पुणे : इंदापूर तालुक्यातील निमगाव केतकी येथून एक धक्कादायक बातमी समोर आली आहे. निमगाव केतकी या गावात चाकूने सपासप वार करुन ३३ वर्षीय महिलेचा खून करण्यात आला आहे. सुनिता दादाराम शेंडे असं खून झालेल्या महिलेचे नांव आहे. ती महिला सहकारी पतसंस्थेची अध्यक्षा आहे.
याबाबत अधिक माहिती अशी की, याप्रकरणी आरोपी ज्ञानेश्वर बबन रासकर (रा. सुरवड ता. इंदापुर जि.पुणे) याच्या विरोधात इंदापूर पोलिसात गुन्हा दाखल करण्यात आला आहे. आरोपी स्वतःहून इंदापूर पोलीस स्टेशनला हजर झाला होता. ही घटना दि.०४ डिसेंबर रोजी रात्री सव्वा आठ ते साडेआठ वाजण्याच्या सुमारास निमगाव केतकी सराफवाडी रोडवरील अजिनाथ मोरे यांच्या पत्र्याच्या शेडमध्ये घडली आहे.
पोलिसांनी दिलेल्या माहितीनुसार, ४ डिसेंबर रोजी रात्री सव्वा आठ ते साडे आठ च्या सुमारास ज्ञानेश्वर बबन रासकर यांनी अज्ञात कारणामुळे सुनिता दादाराव शेंडे यांच्या डोक्यात, पोटावर, छातीवर, हातावर चाकूने वार केले. यात सुनिता शेंडे यांचा जागीच मृत्यू झाला. मयत विवाहितेचा पती दादाराव निवृत्ती शेंडे (वय 37 वर्षे, रा.शेंडेवस्ती, निमगाव केतकी, ता.इंदापूर) याने या प्रकरणी पोलिसात फिर्याद दिली आहे. सदर गुन्ह्याचा तपास पोलिस निरीक्षक सुर्यकांत कोकणे यांच्या मार्गदर्शनाखाली फौजदार गावडे करीत आहेत.
