महाराष्ट्रराजकारण

अमरावतीच्या आमदार सहा वर्षासाठी पक्षातून निलंबित

अमरावती विधानसभा मतदारसंघाच्या आमदार सुलभा खोडके उद्या (रविवारी) अजित पवार यांच्या राष्ट्रवादी काँग्रेस पक्षात प्रवेश करणार असल्याच्या पार्श्वभूमीवर काँग्रेस पक्षातून त्यांना सहा वर्षांसाठी निलंबित करण्यात आले आहे. पक्ष विरोधी कारवाया केल्याने प्रभारी रमेश चेन्नीथला यांच्या निर्देशावरून प्रदेशाध्यक्ष नाना पटोले यांनी निलंबनाची कारवाई केली आहे. उद्या (रविवारी) उपमुख्यमंत्री अजित पवार अमरावती दौऱ्यावर असून उद्याच प्रवेश होणार असल्याची माहिती समोर आली आहे, त्याआधी काँग्रेस पक्षाने त्यांच्यावर कारवाई केली आहे.

अजित पवारांनी शिवसेना आणि भाजप यांच्यासोबत सरकार स्थापन केल्यापासून काँग्रेसच्या आमदार सुलभा खोडके यांची राष्ट्रवादी काँग्रेस अजित पवार या गटासोबत जास्त सलगी वाढल्याच्या चर्चा आहेत. अमरावती मतदारसंघाच्या विविध विकासकामांसाठी निधी, शासन स्तरावर प्रलंबित समस्या सोडविण्यासाठी सुलभा खोडके यांनी अजित पवारांची मदत घेतली.

नुकत्याच पार पडलेल्या राज्यसभा, त्यानंतर विधान परिषद निवडणुकीत काही काँग्रेस आमदारांवर ‘क्रॉस व्होटिंग’ केल्याचा ठपका ठेवण्यात आला होता.त्यामध्ये सुलभा खोडके यांचे देखील नाव असल्याची चर्चा होती, तर काँग्रेसच्या श्रेष्ठींनी ज्या पाच आमदारांनी क्रॉस व्होटिंग केल्याचा ठपका ठेवला होता त्यांना विधानसभेची उमेदवारी नाहीच, असा निर्णय घेतला. त्यात सुलभा खोडकेंचं नाव होतं. त्यामुळे त्यांनी पक्षप्रवेशाचा निर्णय घेतल्याच्या चर्चा राजकीय वर्तुळात सुरू होत्या. त्याचबरोबर लोकसभा निवडणुकीत काँग्रेसचे उमेदवार बळवंत वानखडे यांच्या प्रचारादरम्यान त्या कुठे दिसल्या नाहीत. एकंदरीत आमदार खोडके यांनी अजित पवार पक्षाची वाट धरल्याच्या चर्चा सुरू होत्या.

Related Articles

Leave a Reply

Your email address will not be published. Required fields are marked *

Back to top button