महाराष्ट्रराजकारण

मुंबईचे माजी पोलीस महासंचालक संजय पांडे विधानसभा निवडणूक लढवणार, स्थापणार स्वत:च पक्ष

मुंबई : महाराष्ट्रात लवकरच विधानसभा निवडणुका होणार असून सर्वच राजकीय पक्ष पूर्ण ताकदीने निवडणुकीच्या रिंगणात उतरण्याच्या तयारीत आहेत. यातच मुंबईचे माजी पोलीस महासंचालक संजय पांडे यांनीही निवडणूक लढवण्याची घोषणा केली आहे. मुंबईतील वर्सोवा मतदारसंघातून विधानसभा निवडणूक लढवणार असल्याचे त्यांनी सांगितले. पांडे म्हणाले की, मी बऱ्याच दिवसांपासून सक्रिय राजकारणात येण्याचा विचार करत होतो. मात्र यावेळी मी विधानसभा निवडणूक लढवणार हे निश्चित झाले आहे. तसचे पक्षनोंदणीचीही प्रक्रिया सुरु असल्याचे त्यांनी सांगितले.

संजय पांडे यांनी माध्यमाशी बोलताना सांगितले की, मी सध्या वर्साेवा मतदारसंघातून अपक्ष म्हणून निवडणूक लढवण्याचा निर्णय घेतला आहे. मी गेली अनेक वर्षे येथे राहत आहे, येथील लोकांचा मला पाठिंबा आहे. निवडणूक लढवण्यासाठी अद्याप कोणत्याही राजकीय पक्षाशी संपर्क केला नाही, आपण स्वत: राजकीय संघटना स्थापन करणार असून त्याची नोंदणी प्रक्रिया सुरु आहे.

संजय पांडे यांना सीबीआयने सप्टेंबर 2022 मध्ये कथित फोन टॅपिंग प्रकरणात अटक केली होती. त्यानंतर दिल्ली उच्च न्यायालयाने त्यांना जामीन मंजूर केला. अटकेनंतर संजय पांडे खूप चर्चेत आले होते. यासोबतच सीबीआयने संजय पांडे यांच्या आयएसईसी सर्व्हिसेस कंपनीवरही गुन्हा दाखल केला होता. या कंपनीद्वारे 2 लेखापरीक्षित स्टॉक ब्रोकर्सचे ऑडिट करण्यात आले होते. सीबीआयने ऑडिटमध्ये अनियमितता आढळल्याचा आरोप केला होता, परंतु पुराव्याअभावी सीबीआयला क्लोजर रिपोर्ट दाखल करता आला नाही. पांडे 1986 च्या बॅचचे आयपीएस अधिकारी आहेत. त्यांनी आयआयटी कानपूरमधून शिक्षण घेतले आहे.

Related Articles

Leave a Reply

Your email address will not be published. Required fields are marked *

Back to top button