मुंबई ते नवी मुंबई जोडणाऱ्या अटल सेतूवर आत्महत्येची आणखी एक धक्कादायक घटना समोर आली आहे. मिळालेल्या माहितीनुसार, सोमवारी एका ४० वर्षीय बँक मॅनेजरने अटल सेतूवरून समुद्रात उडी मारून आत्महत्या केली. ही घटना सोमवारी सकाळी उघडकीस आली. घटनेची माहिती मिळताच शिवडी पोलिसांचे पथक तातडीने घटनास्थळी पोहोचले आणि शोधमोहीम सुरू केली.
पोलिसांनी सांगितले की, सोमवारी सकाळी ९.५७ च्या सुमारास सुशांत चक्रवर्ती याने मुंबईतील मुंबई ट्रान्स हार्बर लिंक (अटल सेतू) पुलावर आपली एसयूव्ही पार्क केली आणि कथितरित्या समुद्रात उडी मारली. वरिष्ठ पोलिस निरीक्षक रोहित खोत म्हणाले, “आम्हाला वाहतूक विभागाकडून माहिती मिळाली, त्यानंतर समुद्रात उडी मारलेल्या व्यक्तीचा शोध घेण्यासाठी पथके घटनास्थळी पाठवण्यात आली.”
पोलिसांना घटनास्थळी एक वाहन सापडले, त्याची झडती घेतल्यावर असे आढळून आले की, चक्रवर्ती हे मुंबईतील परळ परिसरात पत्नी आणि मुलीसोबत राहतात. चक्रवर्ती यांच्या पत्नीने पोलिसांना सांगितले की, तिचा बँक मॅनेजर पती कामाचा प्रचंड दबावाखाली होता.
पोलिसांनी दिलेल्या माहितीनुसार, सुशांत चक्रवर्ती त्याच्या एसयूव्हीमध्ये अटल सेतू पुलावर गेला होता. एका फलकाजवळ गाडी उभी करून त्याने स्वतः समुद्रात उडी घेतली. तेथून जाणाऱ्या एका व्यक्तीने अधिकाऱ्यांना माहिती दिली. त्यानंतर शिवडी पोलिस आणि किनारी पोलिसांचे पथक घटनास्थळी पोहोचले.
गेल्या काही महिन्यांतील अटल सेतू येथून आत्महत्येची ही चौथी घटना आहे. या महिन्यात एका ३५ वर्षीय बँकरने अटल सेतूवरून उडी मारून आत्महत्या केली. ॲलेक्स रेगी असे मृताचे नाव असून तो पुण्याचा रहिवासी आहे. त्यानंतरही मृतक कामाच्या दबावाखाली असल्याचा आरोप कुटुंबीयांनी केला होता. यापूर्वी मुलुंडमध्ये राहणाऱ्या ५६ वर्षीय महिलेने अटल सेतूवरून आत्महत्येचा प्रयत्न केला होता. त्यानंतर कॅब चालकामुळे त्यांचे प्राण वाचले. ज्या कॅबमध्ये ही महिला भाड्याने घेऊन घटनास्थळी पोहोचली होती त्याच कॅबच्या चालकाने तिला वाचवल्याचे पोलिसांनी सांगितले. महिलेने पुलावरून समुद्रात उडी मारताच चालकाने तिचे केस पकडले. या घटनेपूर्वी ३८ वर्षीय अभियंत्याने अटल सेतूवरून उडी मारून आत्महत्या केली होती.
