मुंबई : काल झालेल्या शपथविधी सोहळ्यात भाजप नेते देवेंद्र फडणवीस यांनी मुख्यमंत्रीपदाची, तर एकनाथ शिंदे आणि अजित पवार यांनी उपमुख्यमंत्रीपदाची शपथ घेतली. दरम्यान, विधानसभेच्या विशेष अधिवेशनासाठी आज (दि. ६) राजभवनामध्ये राज्याचे राज्यपाल सी.पी. राधाकृष्णन हंगामी विधानसभा अध्यक्ष यांना शपथ देणार आहेत. राज्याच्या विधानसभेच्या हंगामी अध्यक्षपदी भाजपचे आमदार कालिदास कोळंबकर यांची नियुक्ती होणार आहे.
आज ते हंगामी अध्यक्ष म्हणून राजभवनात जाऊन शपथ घेतील. विशेष अधिवेशनामध्ये नवनिर्वाचित आमदारांना पद आणि गोपनीयतेची शपथ देण्यासाठी हंगामी अध्यक्षांची निवड केली जाते. ७, ८ आणि ९ डिसेंबर या तीन दिवसांच्या विशेष अधिवेशन दरम्यान हे हंगामी अध्यक्ष विधानसभेतील नवनिर्वाचित आमदारांना पद आणि गोपनीयतेची शपथ देतील.
सर्वात ज्येष्ठ आमदार म्हणून कालिदास कोळंबकर हंगामी विधानसभा अध्यक्ष पद भूषवणार आहेत. पुढील तीन दिवसीय अधिवेशनात कोळंबकरांकडे हंगामी अध्यक्ष पदाची जबाबदारी राहील. पहिल्या दोन दिवसांत नवनिर्वाचित आमदारांना ते शपथ देतील. ९ डिसेंबररोजी नव्या अध्यक्षाची निवड होईल. आमदारांच्या बहुमताने विधानसभा अध्यक्षांची निवड करण्यात येईल. विधानसभेच्या हंगामी अध्यक्षपदी कालिदास कोळंबकर यांची आज निवड होणार आहे.
कोण आहे कोळंबकर
कालिदास कोळंबकर हे वडाळा मतदारसंघाचे आमदार असून त्यांची हे आमदारकीची नववी टर्म आहे. त्यांनी शिवसेना ठाकरे गटाच्या उमेदवार श्रद्धा जाधवचा पराभव केला आहे.
कालिदास कोळंबकर यांचा शिवसेना, काँग्रेस आणि भाजप असा राजकीय प्रवास राहिला आहे. ते नायगाव आणि वडाळा अशा दोन मतदारसंघातून आमदार राहिले आहेत. कालिदास कोळंबकर हे नारायण राणे यांचा समर्थक मानले जातात. नारायण राणे शिवसेनेतून बाहेर पडले त्यावेळी त्यांना देखील पक्षाला रामराम ठोकला होता.
