मै झुकेगा नही साला… म्हणणाऱ्या पुष्पाला म्हणजे अल्लु अर्जुनला अखेर पोलिसासमोर झुकावेच लागले. त्याने एफआयआर रद्द करण्यासाठी केलेली याचिका कोर्टाने फेटाळल्यानंतर पोलिसांनी त्याला अटक केली.
साऊथ सुपरस्टार अल्लू अर्जुनला संध्या थिएटरमधील चेंगराचेंगरीप्रकरणी हैदराबादमधील चिक्कडपल्ली पोलिसांनी अटक केली आहे. 4 डिसेंबर रोजी संध्या थिएटरमध्ये ‘पुष्पा 2’ या चित्रपटाचा प्रीमिअर आयोजित करण्यात आला होता. यावेळी अल्लू अर्जुनची एक झलक पाहण्यासाठी चाहत्यांनी तुंबड गर्दी केली होती. यावेळी झालेल्या चेंगराचेंगरीत 35 वर्षीय महिलेचा मृत्यू झाला होता. याप्रकरणी अल्लू अर्जुनविरोधात एफआयआर दाखल करण्यात आली होती. याविरोधात बुधवारी त्याने तेलंगणा उच्च न्यायालयात धाव घेतली होती. हैदराबादमधील संध्या थिएटरमध्ये ‘पुष्पा 2’च्या प्रीमिअरदरम्यान चेंगराचेंगरीत श्वास गुदमरल्यामुळे एका महिलेचा मृत्यू झाल्याप्रकरणी त्याच्याविरुद्ध दाखल केलेला एफआयआर रद्द करण्याची मागणी त्याने केली होती. चेंगराचेंगरीत 35 वर्षीय महिलेचा मृत्यू झाला तर तिच्या नऊ वर्षांच्या मुलाला रुग्णालयात दाखल करण्यात आलं होतं.
या चेंगराचेंगरीत ज्या महिलेचा मृत्यू झाला होता त्या महिलेचे नाव रेवती असल्याचं म्हटलं जात आहे. या महिलेच्या कुटुंबीयांच्या तक्रारीनंतर पोलिसांनी अर्जुन, त्याची सुरक्षा टीम आणि थिएटर व्यवस्थापनाविरुद्ध 4 डिसेंबर रोजी गुन्हा दाखल केला होता. अखेर आता या प्रकरणी अल्लू अर्जुनला अटक अटक करण्यात आली आहे.
कोर्टाने याचिका फेटाळली
अल्लू अर्जुनने एफआयआर रद्द करण्याची मागणी करणारी याचिका दाखल केली होती. तसेच, याचिका निकाली निघेपर्यंत अटकेसह पुढील सर्व कारवाईला स्थगिती देण्याचे आवाहन केले होते. मात्र कोर्टाने ही याचिका फेटाळली. त्यामुळे पुष्पाराजला अखेर पोलिसांसमोर झुकावंच लागलं.
