नवी दिल्ली: भारत आणि झिम्बाब्वे यांच्यातील ५ टी२० सामन्यांच्या मालिकेतील शेवटचा सामना रविवारी हरारे स्पोर्ट्स क्लबमध्ये खेळला गेला. झिम्बाब्वेचा कर्णधार सिकंदर रझा यांनी नाणेफेक जिंकून प्रथम गोलंदाजी करण्याचा निर्णय घेतला. प्रथम फलंदाजीला आलेल्या भारतीय संघाने २० षटकांत ६ गडी गमावून १६७ धावा केल्या.
गेल्या सामन्यात अर्धशतक झळकावणारा कर्णधार शुभमन गिल शेवटच्या सामन्यात मोठी खेळी करण्यात अपयशी ठरला. त्याने २ चौकारांसह १४ चेंडूत १३ धावा केल्या. रिचर्ड नगारवाने भारतीय कर्णधाराचा गडी बाद केला. या छोट्या खेळीनंतरही गिलने सूर्यकुमार यादवचा खास रेकॉर्ड तोडला. मात्र, तो विराट कोहलीपेक्षा मागेच राहिला. सूर्यकुमारला मागे टाकले
शुभमन गिल ५ टी२० सामन्यांच्या मालिकेत दुसऱ्या क्रमांकाचा सर्वाधिक धावा करणारा भारतीय कर्णधार ठरला आहे. झिम्बाब्वेविरुद्ध ५ सामन्यांच्या टी२० मालिकेत गिलने ४२.५० च्या सरासरीने आणि १२५.९३ च्या स्ट्राइक रेटने १७० धावा केल्या. त्याने या दरम्यान २ अर्धशतकेही झळकावली. यापूर्वी २०२३ मध्ये सूर्यकुमार यादवने ऑस्ट्रेलियाविरुद्ध ५ सामन्यांच्या टी२० मालिकेत कर्णधार म्हणून १४४ धावा केल्या होत्या. तसेच, २०२१ मध्ये विराट कोहलीने इंग्लंडविरुद्ध ५ सामन्यांच्या टी२० मालिकेत कर्णधार म्हणून २३१ धावा केल्या होत्या.
मालिकेत गिलचे प्रदर्शन
मालिकेच्या पहिल्या टी२० सामन्यात झिम्बाब्वेने भारताला १३ धावांनी पराभूत केले होते. या सामन्यात शुभमन गिलने २९ चेंडूत ३१ धावा केल्या होत्या. मालिकेच्या दुसऱ्या टी२० सामन्यात भारतीय कर्णधाराची फलंदाजी चालली नव्हती आणि तो ४ चेंडूत फक्त २ धावा करू शकला होता. तिसऱ्या टी२० सामन्यात गिलने अर्धशतक झळकावले होते. त्याने ४९ चेंडूत ६६ धावा केल्या होत्या. मागील टी२० सामन्यात गिलने ३९ चेंडूत नाबाद ५८ धावा केल्या होत्या.
