अजित पवार गटात नेत्याची इनकमिंग, अनेक मातब्बर नेत्यांची पक्षात एंट्री?

नवी दिल्ली : विधानसभा निवडणुकीपूर्वी पक्षांतराचे वारे जोरात वाहत होते. अनेक मातब्बर नेत्यांनी स्वपक्ष सोडून दुसऱ्या पक्षात प्रवेश केला होता. महायुतीला स्पष्ट बहुमत मिळाल्यानंतर महायुतीच्या पक्षात सध्या नेत्यांची इनकमिंग सुरु आहे. शिवसेना ठाकरे गट आणि राष्ट्रवादी शरदचंद्र पवार गटाला सध्या एकामागे एक धक्के बसत आहे. शरद पवारांच्या राष्ट्रवादीचे श्रीगोंद्यातील माजी आमदार अजित पवारांच्या राष्ट्रवादीत प्रवेश करणार असून शिवसेना ठाकरे गटाचा एक बडा नेताही त्याच वाटेवर असल्याचे समजते.

शिवसेना उद्धव ठाकरे गटाचे नेते माजी आमदार अपूर्व हिरे यांनी अजित पवार यांची आज भेट घेतली आहे. अपूर्व हिरे हे या पूर्वी राष्ट्रवादी अजित पवार गटातच होते. मात्र यंदाच्या विधानसभा निवडणुकीत मालेगाव बाह्य विधानसभा मतदारसंघात महायुतीचे शिवसेना शिंदे गटाचे उमेदवार दादा भुसे यांच्या विरोधात अपूर्व हिरे यांचे बंधू अद्वय हिरे यांना शिवसेना ठाकरे गटाकडून उमेदवारी जाहीर करण्यात आली होती.

अद्वय हिरे यांच्या प्रचार करण्यासाठी अपूर्व हिरे यांनी राष्ट्रवादी अजित पवार गटाला सोडचिठ्ठी देत शिवसेना ठाकरे गटात प्रवेश केला होता. मालेगाव बाह्य विधानसभा मतदारसंघातून दादा भुसे यांनी अद्वय हिरे यांचा पराभव केला. यानंतर आता अपूर्व हिरे यांनी मुंबई येथे अजित पवार यांची भेट घेतली आहे. त्यामुळे अपूर्व हिरे राष्ट्रवादीत पुन्हा घरवापसी करणार असल्याची चर्चा राजकीय वर्तुळात रंगली आहे. आता अपूर्व हिरे नेमका काय निर्णय घेणार? याकडे सर्वांचे लक्ष लागले आहे.

दरम्यान, राष्ट्रवादी काँग्रेस शरदचंद्र पवार पक्षाशी एकनिष्ठ राहिलेले आणि विधानसभेला पराभूत झालेले राहुल जगताप यांच्या पाठोपाठ आता मानसिंग नाईक देखील अजित पवारांच्या भेटीसाठी पोहचले आहेत. अजित पवारांनी निकालाच्या दिवसांपासून शरद पवार गटातील पराभूत आणि निवडून आलेल्या उमेदवाराना फोन करण्यास सुरुवात केली होती. अजित पवारांनी फोन केलेल्या दोन महत्त्वाच्या नेत्यांनी अजित पवारांशी भेटून चर्चा केली आहे. यापैकी राहुल जगताप लवकरच अजित पवारांच्या राष्ट्रवादीत प्रवेश करणार असल्याची माहिती मिळत आहे. त्यामुळे राष्ट्रवादी काँग्रेस पक्षाचे राष्ट्रीय अध्यक्ष अजित पवार यांचा प्लॅन बी यशस्वी होण्यास सुरुवात झाल्याचे दिसून येत आहे.